Kor går grensa – og kor ligg moglegheitene?

Den nyleg lanserte tålegrenseanalysen frå Vestlandsforsking viser at Luster kommune står ved eit viktig vegskilje. Medan reiselivet gir verdifull inntekt for nokre, er varsellampene i ferd med å blinke. Analysen peikar på tre hovudutfordringar: låg lokal verdiskaping frå mange gjester, særleg knytt til camping og cruise, overbelasta infrastruktur med smale vegar som i periodar kan true beredskapen, og aukande sosial frustrasjon blant innbyggjarane, knytt til kø, villcamping og store cruisegrupper.

Som forvaltarar av ein av dei mest besøkte attraksjonane i Luster kommune har vi sjølve eit stort ansvar for både å ta vare på dei umistelege verdiane og samstundes leggje til rette for at gjester frå heile verda kan oppleve dei – utan at det går utover tålegrensa til lokalsamfunnet.

Verdsarvstatusen er ikkje berre noko vi forvaltar, men òg eit verktøy for lokal verdiskaping. Vi ønskjer difor å invitere til ein kveld med fokus på korleis vi saman kan skape meir lokal verdiskaping utan å gå på akkord med verdiane som du, som innbyggjar i Luster kommune, og vi, som forvaltarar av verdsarven, tek vare på.

På verdsarvforumet får du høyre:

• Kristin Løseth frå Vestlandsforsking presenterer hovudfunna frå den nye tålegrenseanalysen for Luster, og kva den fortel oss om utfordringar og moglegheiter framover

• Lindis frå Bestebakken deler erfaringar med korleis ho har brukt småbruket, urtehagen og stølen til å skape eit anerkjent produkt som tiltrekkjer seg reisande som blir verande i området over tid

• om korleis det komande Verdsarvsenteret og Urneshagen vil gjere det mogleg å besøkje Ornes utan å belaste lokalsamfunnet, og gi gjestane høve til å gje noko tilbake

• kvifor buffersona kring verdsarven ikkje berre er ei avgrensing, men og kan vere ein moglegheit for lokal verdiskaping

• korleis du kan vere med å forme partnarprogrammet Ven med verdsarven

• bevertning, god tid til prat og høve til å sjå utstillinga Vår verdsarv

Vi ser fram til å sjå deg!

Venleg helsing,

Ingebjørg Njøs Storvik (verdsarvkoordinator) og Morten Stensland Løwe (skjøtselansvarleg)

på vegne av Verdsarvrådet, Fortidsminneforeningen og Luster kommune